Bu gün Azərbaycanla bağlı tarixi həqiqətlərin dünyaya çatdırılmasında mətbuat, sosial şəbəkələrlə yanaşı 2001-ci il 15 iyun tarixindən fəaliyyətə başlamış “Vikipediya” elektron ensiklopediyasının rolu da əvəzsizdir. İnternet resurslarının inkişafı Azərbaycanda da bu sahədə peşəkar fəaliyyətin önə çıxmasını şərtləndirib.

2015-ci ildən AMEA Mərkəzi Elmi Kitabxanasında fəaliyyət göstərən Elektron resurslar şöbəsi də işini elektron resursları üzərində qurub, təminatı üzrə ixtisaslaşaraq kitabxananın bu formatda olan materialları üzərində işləyir. 329 dildə fəaliyyət göstərən vikipediya onlayn ensiklopediyası arasında azərbaycandilli vikipediyasının öz mövqeyini 55-ci yerdə saxlamasında bir çox vikipediya istifadəçiləri ilə yanaşı AMEA MEK-in Elektron resurslar şöbəsinin əməkdaşlarının töhfələri də əvəzsizdir. Bu gün dünyada və Azərbaycanda internet resurslarının inkişafı Vikipediyada peşəkar fəaliyyətin önə çıxmasında da öz təsirini göstərir. Bu gün azərbaycandilli vikipediyada 202 mindən artıq məqalə vardır.

Elektron resurslar şöbəsi Azərbaycanın tarixi, ədəbiyyatı, coğrafiyası, mədəniyyəti, arxeologiya və etnoqrafiyası, flora və faunası və digər sahələrə dair məqalələrin hazırlanaraq Vikipediyaya daxil edilməsi və əsaslı redaktəsini icra edir. Şöbə azərbaycandilli və xaricidilli Vikipediyada məqalələrin sistematik yerləşdirilməsi, redaktəsi, yoxlanılmasını həyata keçirir, habelə könüllülərə təlimlərin icrası üzrə tərəfdaş strukturlarla əməkdaşlıq aparır. Elmi tədqiqat mərkəzləri, universitetlər, akademik tədqiqat institutları və s. elmi qurumlara Vikipediya ilə bağlı təlimlərin keçirilməsini təşkil edir. Həmçinin şöbə geniş oxucu kütləsini Azərbaycana aid informasiya resursları ilə təmin etmək üçün azərbaycandilli Vikipediyanı müxtəlif mövzularda materiallarla zənginləşdirir, innovasiyaları və qabaqcıl təcrübələri öyrənir, müəssisənin fəaliyyətinə uyğunlaşdırır və tətbiq edir.

Şöbə işini MEK-in fəaliyyətini təmin edən Əsasnaməyə, Azərbaycan Respublikasının “İnformasiya, informasiyalaşdırma və informasiyanın mühafizəsi haqqında” (1998) “Müəlliflik hüququ və əlaqəli hüquqlar haqqında” (1996) Qanunlarına, həmçinin kitabxana direktorunun əmr və qərarlarına uyğun qurur.

Azərbaycanın milli, mədəni, elmi irsinə dair məlumatların məqalələr şəklində yaradılaraq mərkəzləşdirilmiş şəkildə Vikipediyada, Vikipediyanın norma və prinsiplərinə uyğun olaraq yerləşdirilməsini, Azərbaycan və dünya araşdırmaçılarının istifadəsinə verilməsini, eləcə də gələcək nəsillərə ötürülməsiNİ, AMEA institutları, bir çox dövlət müəssisələri və təşkilatlar tərəfindən göndərilən əməkdaşlara Vikipediya təlimlərinin keçirilməsini, həmçinin Vikipediyanın prinsiplərinə uyğun olaraq məqalələrin ensiklopedik məzmunda, oxunaqlı dildə və akademik şəkildə konkret faktlar əsasında tərtib edir. Təlimlər müraciətlər əsasında təşkil olunur və keçirilir. Təlimlər zamanı Vikipediyanın tarixi, mahiyyəti, prinsipləri, məqalələrin yaradılması və redaktə edilməsi ətraflı şəkildə izah olunur. Yekunda, əldə edilmiş peşəkar  qabilliyyətlərinə (10 məqalə yaratmaq tələbi) uyğun olaraq könüllülər MEK rəhbərliyi tərəfindən sertifikatla qiymətləndirilir. Şöbəyə Reyhan Əhmədova rəhbərlik edir və şöbədə 13 əməkdaş fəaliyyət göstərir.

"