Oxuculara xidmət şöbəsi MEK-in ən böyük şöbələrindən biridir. Hal-hazırda şöbədə 20 əməkdaş çalışır. MEK-in xidmətlərindən faydalanacaq oxucuların qeydiyyatı, onların sifariş etdikləri resurslarla  təmin edilməsi və geri qəbul edilərək müvafiq saxlanca göndərilməsi fəaliyyətini Oxuculara xidmət şöbəsi həyata keçirir. 

Şöbə AMEA-nın elmi-tədqiqat müəsisələri və təşkilatlarının əməkdaşları daxil olmaqla, Bakı şəhərinin və respublikanın elmi tədqiqat müəssisələrinə, ali məktəblərə və xarici ölkələrin kitabxanalarından müraciət edən oxuculara xidmət göstərir. Oxu zallarından, kitab və kitabxana fonduna məxsus digər sənədlərdən istifadə üçün kitabxanaya gələn oxucuya  MEK haqqında ətraflı məlumat verilir, oxucu təlimatı ilə tanış olur,  qeydiyyatdan keçərək istifadəçi kartı əldə edir. AMEA-nın əməkdaşları, dissertant və doktorantları, Qarabağ və Vətən müharibəsi qaziləri, habelə şəhid ailələri və veteranların ailələri, eləcə də yaşı 75-dən yuxarı olan şəxslər üçün oxu zallarından, kitab və kitabxana fondlarına məxsus sənədlərdən istifadə ödənişsiz əsaslarla həyata keçirilir. Hər ayın sonunda çıxarışlar hazırlanıb, AMEA-nın institutlarından müraciət edən istifadəçilərə təqdim edilir. Şöbə oxuculara xidmət  işini Oxu zalları (Humanitar və ictimai  elmlər, Dövri mətbuat, Dissertasiya və avtoreferat, Sərgi, Akademiklərin zalı) və Kitabxanalararası abonoment vasitəsilə həyata keçirir. Humanitar və ictimai elmlər üzrə zalda  oxucuların mütaliəsi üçün hər cür şərait yaradılmışdır. Oxu zalında yardımçı fond fəaliyyət göstərir. Fond oxucu sorğuları əsasında komplektləşdirilir. Oxucular yardımçı fonddan ədəbiyyatı sifariş vermədən alıb mütaliə edirlər. Akademiklərin zalında mövcud olan Yardımçı və Diplomatik fondların tərkibində müxtəlif elm sahələrini əhatə edən nəşrlər Azərbaycan və xarici dillərdədir. Xarici dövlətlərin səfirliklərindən əldə edilən kolleksiyalar daima zənginləşir və yeni bölmələr yaranır. Zalda yerləşən bütün kitablar e-kataloqa daxil edilmiş və topoqrafik kartoçkalar tərtib edilmişdir. Burada oxuculara xidmət, biblioqrafik sorğuların təmin edilməsi və gələn qonaqlara zal haqqında informasiya verilir. Bundan başqa zalda müxtəlif tədbirlər keçirilir.

Oxuculara xidmət şöbəsi tərəfindən Sərgi zalında MEK-ə daxil olan yeni  ədəbiyyatın sərgisi  təşkil edilir və bu ədəbiyyatlar 15 gün ərzində sərgilənir. Eyni zamanda görkəmli şəxsiyyətlərin yubileyləri, əlamətdar və tarixi günlərə dair kitab, dövri mətbuat sərgiləri , ədəbiyyat həftələri və illik sərgilər də təşkil olunur.Dövri mətbuat yardımçı fondunda qəzet və jurnallar mühafizə olunur. Gündəlik gələn qəzetlərin qeydiyyatı aparılır, proqrama daxil edilir, rəflərə yerləşdirilir və 3 ay sonra fonda  təhvil verilir. Həmçinin yeni gələn jurnallar kataloqa yazılır və rəflərə düzülür. Eyni zamanda həm fonddan, həm də yardımçı fonddan jurnallar və qəzetlər oxuculara sifariş əsasında  təqdim edilir, istifadədən sonra isə fonda və yardımçı fonda geri qaytarılır.