Oktyabrın 21-də Bakı Ekspo Mərkəzində Azərbaycan Respublikası Mədəniyyət Nazirliyinin təşkilatçılığı ilə XII Bakı Beynəlxalq Kitab Sərgisi fəaliyyətə başlayıb. Azərbaycan Milli Elmlər Akademiyası (AMEA) sərgidə öz stendi ilə təmsil olunur. AMEA-nın Mərkəzi Elmi Kitabxanası (MEK) ənənəvi olaraq sərgidə iştirak edərək nəşrlərini, eləcə də fondunda mühafizə olunan elmi, tarixi və siyasi mövzulu kitabları ziyarətçilərin diqqətinə təqdim edir. Kitabxananın nəşrləri elmi və mədəni irsin təbliği, eləcə də zəngin kitab fondunun tanıdılması baxımından əhəmiyyət daşıyır. “Həyat ekrandan böyükdür: bir uşaq, bir kitab, bir gerçək dünya” devizi altında keçirilən builki sərgidə 30 xarici ölkədən 59 təşkilat, həmçinin 147 yerli nəşriyyat-poliqrafiya müəssisəsi və kitab sənəti ilə əlaqəli qurum iştirak edir. Sərgidə Azərbaycanın Xalq yazıçıları və Xalq şairləri, gənc qələm sahibləri ilə yanaşı, Türkiyə, ABŞ, Norveç, Böyük Britaniya, Polşa, Səudiyyə Ərəbistanı və digər ölkələrdən tanınmış müəlliflər və alimlər də iştirak edirlər. Kitab sərgisi çərçivəsində AMEA-nın təşkilatçılığı ilə bir sıra kitab təqdimatlarının keçirilməsi də nəzərdə tutulur.