Azərbaycan Milli Elmlər Akademiyasının (AMEA) Mərkəzi Elmi Kitabxanası (MEK) beynəlxalq əməkdaşlıq əlaqələrini uğurla davam etdirir. Türkiyədəki səfirliyimizin nəzdində fəaliyyət göstərən Azərbaycan Mədəniyyət Mərkəzinin təşəbbüsü və layihəsi əsasında İstanbulun tarixi Rami Kitabxanasında ötən ay fəaliyyətə başlayan “Azərbaycan bölməsi”nin yaradılmasında MEK yaxından iştirak edib. Mərkəzi Elmi Kitabxana tərəfindən ölkəmizin qədim və zəngin tarixini, dövlətçilik ənənələrini, çoxəsrlik mədəni irsini, ədəbiyyatını, incəsənətini, musiqisini, görkəmli şəxsiyyətlərini və müasir inkişafını əks etdirən çoxsaylı ədəbiyyat “Azərbaycan bölməsi”nə təqdim olunub. Qeyd edək ki, MEK ilə İstanbulun Rami Kitabxanası arasında imzalanmış “Qardaş Kitabxanalar Anlaşma Memorandumu” elmi, informasiya və mədəni əlaqələrin inkişafı, kitabxana sahəsində təcrübə mübadiləsi və qarşılıqlı əməkdaşlığın genişləndirilməsi baxımından mühüm əhəmiyyət daşıyır. Artıq fəaliyyət göstərən “Azərbaycan bölməsi” ölkəmiz haqqında elmi və mədəni məlumatların Türkiyədə daha geniş auditoriyaya çatdırılmasına, iki ölkənin kitabxanaları arasında əlaqələrin möhkəmləndirilməsinə və milli-mədəni irsimizin beynəlxalq səviyyədə tanıdılmasına töhfə verir.