1 Mart – Ümumdünya Mülki Müdafiə Günü münasibətilə AMEA-nın Mərkəzi Elmi Kitabxanasının Mülki Müdafiə qərargahı tərəfindən maarifləndirici videoçarx nümayiş etdirilib, əməkdaşlara mövzu ilə bağlı mühazirə materialı paylanılıb. “Dayanıqlı və sabit gələcək naminə ekoloji risklərin idarə edilməsi” mövzusuna həsr olunan mühazirədə Azərbaycan Respublikasında mülki müdafiə sahəsində həyata keçirilən ardıcıl və sistemli fəaliyyət, əhalinin təhlükəsizliyinin təmin olunması, təbii və texnogen fəlakətlərin nəticələrinin aradan qaldırılması istiqamətində görülən işlərdən bəhs olunub. Qeyd edilib ki, coğrafi baxımdan seysmik zonada yerləşən Azərbaycan üçün ekoloji risklərin idarə olunması xüsusi aktuallıq kəsb edir. İqlim dəyişikliyi fonunda ölkədə quraqlıq hallarının artması, su ehtiyatlarının azalması və yanğın riskinin yüksəlməsi diqqətə çatdırılıb. Bildirilib ki, ekoloji risklərin idarə olunması üç əsas mərhələdən ibarətdir və bu istiqamətdə kompleks yanaşma vacibdir. Həmçinin respublikada ekoloji təhlükəsizliyin gücləndirilməsi, alternativ enerji mənbələrinin inkişafı və “yaşıl iqtisadiyyat”ın təşviqi istiqamətində atılan addımlar vurğulanıb.