Azərbaycan Milli Elmlər Akademiyasının Mərkəzi Elmi Kitabxanasında 28 May – Müstəqillik Günü münasibətilə kitab sərgisi təşkil olunub. Sərgidə Ulu Öndər Heydər Əliyevin müstəqilliyə gedən yolda xalqımızın milli birlik ruhunun möhkəmləndirilməsi, dövlətçilik ənənələrinin qorunması və Azərbaycanın müstəqilliyinin əbədi, dönməz xarakter alması istiqamətində misilsiz xidmətləri, Azərbaycan Respublikasının Prezidenti İlham Əliyevin rəhbərliyi ilə ölkədə dövlətçilik ənənələrinin möhkəmləndirilməsi, müstəqilliyin qorunması və inkişafına dair nəşrlər, eləcə də Azərbaycan Xalq Cümhuriyyətinin (AXC) yaranma tarixi, dövlətçilik ənənələri, istiqlal mübarizəsi, respublikanın tanınması istiqamətində Azərbaycan diplomatiyasının ilk addımları, xarici dövlətlərlə beynəlxalq əlaqələri, milli azadlıq ideyaları və müstəqillik yolundan bəhs edən sənədlər, kitablar, elmi nəşrlər, ensiklopediyalar və dövri mətbuat nümunələri nümayiş etdirilir. Kitablar sırasında “XX əsr Azərbaycanın görkəmli dövlət qurucuları”, “Müstəqilliyə gedən yol”, “İstiqlal sevgisi”, “Azərbaycan Cümhuriyyəti tələbələri”, “Azərbaycan Xalq Cümhuriyyəti və Qafqaz İslam Ordusu”, “Azərbaycan Xalq Cümhuriyyəti ensiklopediyası”, “Mühacirlərin dönüşü”, “Xalqımızın müstəqil yaşayacağına inanırıq”, “Əlimərdan bəy Topçubaşov. İstanbulda diplomatik görüşlər”, “Azərbaycan Xalq Cümhuriyyəti haqqında dövlət qərarları” və digər nəşrlər yer alır. Sərgi iki həftə ərzində açıq olacaq.