23 may 2026-cı il tarixində Azərbaycan Milli Elmlər Akademiyası (AMEA) Mərkəzi Elmi Kitabxanasının (MEK) tərəfdaşı olduğu Özbəkistan Universitetlərinin III Təhsil Sərgisi keçirilib. Tədbirdə AMEA Rəyasət Heyəti Aparatının Elm və təhsil şöbəsinin müdiri filologiya elmləri doktoru Sərxan Xavəri çıxış edib. Həmin çıxışı təqdim edirik: Əziz və hörmətli tədbir iştirakçıları! İcazə verin, ilk növbədə sizi Azərbaycan Milli Elmlər Akademiyasının prezidenti, çox hörmətli akademik İsa Həbibbəylinin adından, Azərbaycan Milli Elmlər Akademiyasının rəhbərliyi adından, eləcə də Akademiyanın Mərkəzi Elmi Kitabxanasının kollektivi adından səmimi-qəlbdən salamlayım. Yüksək maddi-texniki bazası, müasir infrastrukturu və elmi-mədəni mühiti ilə seçilən Azərbaycan Milli Elmlər Akademiyasının Mərkəzi Elmi Kitabxanasında sizi görməkdən böyük məmnunluq duyur, hər birinizə bu möhtəşəm tədbirə “xoş gəlmisiniz” deyirəm. İslam peyğəmbəri Həzrəti Məhəmmədin (s.ə.s.) məşhur bir hədisi vardır: “Mən elmin şəhəriyəm, Əli isə onun qapısıdır.” Bu hikmətli ifadənin mənasını Akademiya və Kitabxana münasibətlərinə tətbiq etsək, belə demək mümkündür: Azərbaycan Milli Elmlər Akademiyası Azərbaycan elminin müqəddəs məbədidirsə, Mərkəzi Elmi Kitabxana bu müqəddəs məbədin elmə açılan qapısıdır. Bu möhtəşəm bina il ərzində çoxsaylı elmi, mədəni və ictimai tədbirlərə ev sahibliyi edir. Lakin artıq 3-cü dəfədirki MEK-də keçirilən bugünkü tədbir öz məzmunu və strateji mahiyyəti ilə xüsusi əhəmiyyət daşıyır. Çünki bu tədbirin əsas missiyası dövlətimizin uzunmüddətli inkişaf prioritetləri ilə bilavasitə bağlıdır. Azərbaycan Respublikasının Prezidenti, möhtərəm cənab İlham Əliyev 24 fevral 2024-cü il tarixində keçirilmiş andiçmə mərasimində mühüm bir fikir səsləndirmişdir: “Türk dünyası bizim ailəmizdir.” Bu strateji baxışın ideoloji əsası Ümummilli Lider Heydər Əliyev tərəfindən formalaşdırılmış, türk xalqları arasında birlik, həmrəylik və inteqrasiya siyasəti üzərində qurulmuşdur. Bu gün həmin siyasi xətt yeni inkişaf mərhələsinə qədəm qoymuşdur. Hazırda Azərbaycan dövlət siyasətinin mühüm prioritet istiqamətlərindən biri türk xalqları arasında sosial, iqtisadi, mədəni, siyasi, elmi və təhsil sahələrində inteqrasiyanın daha da dərinləşdirilməsidir. Bu strateji hədəfi ən ümumiləşmiş şəkildə belə ifadə etmək mümkündür: “Ortaq türk keçmişindən ortaq türk gələcəyinə.” Bu böyük məqsədə doğru gedən yolda çoxsaylı inteqrasiya platformaları mövcuddur – siyasi platformalar, iqtisadi əməkdaşlıq mexanizmləri, mədəni layihələr, mənəvi körpülər, elmi və təhsil təşəbbüsləri. Bu istiqamətlər arasında elm və təhsilin xüsusi yeri vardır. Çünki müasir dövrdə yüksək texnologiyalar, innovasiya və elmi potensial dövlətlərin inkişafını müəyyən edən əsas amillərdən biridir. Qloballaşan və rəqəmsallaşan dünyada layiqli mövqe tutmaq istəyən türk dünyası elmə, təhsilə və yüksək texnologiyalara xüsusi önəm verməlidir. Tarixə nəzər salsaq, türk sivilizasiyasının inkişaf yolunun texnoloji tərəqqi ilə sıx bağlı olduğunu görərik. Bir zamanlar türk dünyası çöl mədəniyyəti üzərində yüksəlmişdi. Atın gücü, hərəkət qabiliyyəti və çeviklik böyük coğrafiyalarda qüdrətli dövlətlərin yaranmasına imkan yaratmışdı. Zaman dəyişdi. Dənizçilik texnologiyaları inkişaf etdi. Türk xalqları yeni texnoloji imkanları mənimsəyərək dənizlərə hakim oldular, böyük imperiyalar yaratdılar.Bu gün isə bəşəriyyət yeni bir mərhələyə qədəm qoymuşdur. Artıq müasir dünyanın əsas çağırışı kosmik texnologiyalar, süni intellekt, rəqəmsal transformasiya, innovasiya və yüksək elmi potensial uğrunda rəqabətdir. Bu gün güclü olmaq üçün yalnız torpağa və dənizə deyil, həm də kosmosa, informasiyaya və texnologiyaya hakim olmaq lazımdır. 44 günlük Vətən müharibəsi zamanı Azərbaycan xalqı bütün dünyaya göstərdi ki, biz yalnız qəhrəmanlıq və vətənpərvərlik ruhuna malik xalq deyilik, eyni zamanda yüksək texnologiyaları mənimsəyən, müasir hərbi və rəqəmsal imkanlardan səmərəli istifadə edə bilən güclü dövlətik. Bu reallıq bizə göstərir ki, türk dünyasının gələcəyi yalnız ortaq tarixdə deyil, həm də ortaq elmi potensialda, ortaq innovasiya mühitində və ortaq texnoloji gələcəkdə formalaşacaqdır. Bu baxımdan Azərbaycan ilə Özbəkistan arasında elm və ali təhsil sahəsində əməkdaşlığın inkişafı xüsusi əhəmiyyət daşıyır. Bugünkü sərgi və görüşlər yalnız elmi nailiyyətlərin nümayişi deyil, həm də ortaq türk gələcəyinin intellektual təməllərinin möhkəmləndirilməsi istiqamətində atılan mühüm addımdır. İnanıram ki, bugünkü tədbir yeni elmi əməkdaşlıqlara, yeni akademik əlaqələrə və yeni strateji tərəfdaşlıqlara yol açacaq. Bir daha hər birinizi salamlayır, Özbəkistandan gəlmiş dəyərli qonaqlarımıza “xoş gəlmisiniz” deyir, tədbirimizin işinə uğurlar arzulayıram. Diqqətinizə görə təşəkkür edirəm.