Fevralın 25-də AMEA-nın Əsas binasında Azərbaycan Milli Elmlər Akademiyasının (AMEA) Ümumi yığıncağı keçirilib. Əvvəlcə 2025-ci ilin yekunlarına həsr olunmuş sərgiyə baxış olub. Sərgi çərçivəsində AMEA-nın Mərkəzi Elmi Kitabxanası (MEK) öz stendi ilə təmsil olunub. Mərkəzi Elmi Kitabxananın tərtibatında Ulu Öndər Heydər Əliyevin böyük ideallarını, Prezident İlham Əliyevin ekologiya və ətraf mühitin mühafizəsi sahəsində həyata keçirdiyi dövlət siyasətini əks etdirən, qırx dörd günlük II Qarabağ müharibəsi, Qərbi Azərbaycana Qayıdış Konsepsiyası, AMEA-nın 80, MEK-in 100 illik yubileylərinə həsr olunan, eləcə də “Görkəmli elm xadimləri” seriyası altında tərtib olunan biblioqrafik göstəricilər və MEK əməkdaşları tərəfindən hazırlanan dəyərli nəşrlər sərgi iştirakçılarına təqdim olunub. Azərbaycan Respublikası Prezidentinin Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, AMEA-nın prezidenti akademik İsa Həbibbəyli və digər məsul şəxslər MEK-in təşkil etdiyi sərgiyə baxış keçiriblər.