AMEA Rəyasət Heyəti aparatının Elm və təhsil şöbəsinin müdiri, filologiya elmləri doktoru Sərxan Xavərinin müəllifi olduğu “Yaşar Qarayev. Toxunulacaq qədər yaxından” adlı kitab Mərkəzi Elmi Kitabxananın Elektron kitabxanasına daxil edilib. Kitabla yaxından tanış olmaq istəyənlər kitabxananın rəsmi saytında “E-kitabxana” bölməsinə daxil ola bilərlər. Nəşrdə professor Yaşar Qarayevin şəxsiyyəti və zəngin yaradıcılığı yalnız milli ədəbiyyatşünaslıq çərçivəsində deyil, həm də XX əsr ümumtürk humanitar-ictimai elmi düşüncəsi kontekstində geniş şəkildə dəyərləndirilir. Kitabda alimin yaradıcılıq mərhələləri sistemli şəkildə təhlil olunur, onun elmi fəaliyyətində analitik-filoloji başlanğıcdan fəlsəfi-kulturoloji konseptuallaşmaya qədər uzanan inkişaf xətti aydın şəkildə göstərilir. Eyni zamanda, nəşrdə Yaşar Qarayevlə bağlı maraqlı xatirələr və şəxsi yaddaşlardan süzülən məqamlar da yer alır ki, bu da oxucuda alimin obrazını daha dolğun təsəvvür etməyə imkan yaradır.