Naxçıvan Dövlət Universitetinin Elmi Kitabxanasının direktoru Xumar Məmmədova noyabrın 21-i MEK-də keçirilən beynəlxalq elmi konfransdakı nitqi zamanı əvvəlcə Naxçıvan Dövlət Universiteti adından, qədim Naxçıvandan salamlarını çatdırıb. O qeyd edib ki, tədbirin keçirildiyi gün ölkəmiz üçün xüsusilə əlamətdardır, çünki bu gün həm də Yeni Azərbaycan Partiyasının yarandığı gündür. Məmmədova vurğulayıb ki, YAP dövlət başçısının apardığı siyasət nəticəsində artıq zəfər və qalibiyyət partiyası kimi formalaşıb və ölkə bu siyasət sayəsində uğurlara nail olub. O, həmçinin bildirib ki, hazırda Azərbaycanda elmə və təhsilə yüksək qiymət verilir. Bu siyasətin əsası Ümummilli Lider Heydər Əliyev tərəfindən qoyulmuş və Azərbaycan Respublikasının Prezidenti İlham Əliyev tərəfindən yüksək səviyyədə davam etdirilməkdədir. X.Məmmədova qeyd edib ki, Azərbaycanda artıq müasir kitabxana modeli yaradılır və Türk dünyası ölkələri ilə kitabxanalararası əməkdaşlığın mövcudluğu sevindirici haldır. Natiq vurğulayıb ki, kitabxana sistemi, kibertəhlükəsizlik, rəqəmsal kitabxanalar və süni intellekt ölkəmizdə dövlət başçısının diqqətində olan məsələlərdəndir və bununla bağlı aidiyyəti təşkilatların üzərinə mühüm tapşırıqlar verilib. Naxçıvan Dövlət Universitetinin Elmi Kitabxanası ilə AMEA Mərkəzi Elmi Kitabxanası arasında yüksəksəviyyəli tərəfdaşlığın qurulduğunu diqqətə çatdıran X.Məmmədova qeyd edib ki, AMEA ilə Naxçıvan Dövlət Universiteti arasında imzalanan memorandumun bir hissəsi məhz kitabxanalararası əməkdaşlığa həsr olunub. Çıxışçı bildirib ki, artıq universitetin akademik heyəti və tələbələr MEK-in resurslarından istifadə edirlər və yaradılan şəraitə görə təşəkkürünü ifadə edib.