YAP Yasamal rayon təşkilatının sədri Bəxtiyar Nəbiyev AMEA-nın Mərkəzi Elmi Kitabxanasının 100 illik yubileyi münasibətilə keçirilən konfransda çıxışı zamanı Mərkəzi Elmi Kitabxanaya ünvanlanan təbrik məktubunu səsləndirib. “Çox hörmətli Hüseyn müəllim, Azərbaycan Milli Elmlər Akademiyası Mərkəzi Elmi Kitabxanasının 100 illik yubileyi münasibətilə Sizi və rəhbərlik etdiyiniz bu möhtəşəm kitabxananın bütün kollektivini Yeni Azərbaycan Partiyası Yasamal Rayon Təşkilatı adından səmimi-qəlbdən təbrik edirəm. Bir əsrlik tarixi yol keçmiş Mərkəzi Elmi Kitabxana bu gün ölkəmizin elmi-mədəni inkişafında əvəzsiz rol oynayan strateji bir kitabxana və bilik məkanı kimi öz möhkəm yerini tutub, intellektual irsimizin qorunub saxlanmasında, zənginləşdirilməsində və gələcək nəsillərə ötürülməsində böyük xidmətlər göstərib. Bu nüfuzlu kitabxananın uğurlu fəaliyyətində Sizin peşəkarlığınız, təşkilatçılıq bacarığınız və idarəçilik keyfiyyətləriniz xüsusi yer tutur. Sizin rəhbərliyinizlə həyata keçirilən genişmiqyaslı yenilənmə, rəqəmsallaşma, fondların sistemli şəkildə zənginləşdirilməsi, beynəlxalq əməkdaşlıq əlaqələrinin genişləndirilməsi və oxucu xidmətinin müasir tələblərə uyğun qurulması Mərkəzi Elmi Kitabxananı regionun ən qabaqcıl elmi-informasiya mərkəzlərindən birinə çevirib. Bu nailiyyətlər, eyni zamanda, ölkəmizdə elmin inkişafına göstərilən yüksək dövlət qayğısının və müasir Azərbaycan elm siyasətinin bariz təzahürüdür. Ulu Öndər Heydər Əliyevin kitabxana sahəsinə verdiyi strateji dəyər bu sahənin inkişafının möhkəm təməlini formalaşdırıb. Ümummilli Lider Heydər Əliyevin siyasi kursunun layiqli davamçısı Prezident cənab İlham Əliyevin kitabxana sahəsinin modernləşdirilməsi, innovativ mühitin genişləndirilməsi və elmi infrastrukturun yenilənməsi istiqamətində apardığı ardıcıl siyasət bu inkişafı daha da sürətləndirib. Məhz bu diqqət və qayğı nəticəsində Azərbaycan kitabxanası bu gün beynəlxalq kitabxana mühitdə nüfuzlu mövqelərə sahib olub. Bir əsrlik yubiley günündə Mərkəzi Elmi Kitabxananın zəngin və şərəfli tarixi, elmə, təhsilə və maarifçilik ənənələrinə sədaqəti qürurla xatırlanır. Onun fəaliyyəti hər zaman elmi ictimaiyyətə, tədqiqatçılara, tələbələrə və geniş oxucu auditoriyasına etibarlı dəstək olub, Azərbaycanın intellektual mühitinin formalaşmasına mühüm töhfələr verib. Sizin rəhbərliyiniz dövründə isə bu missiya daha da genişlənərək yeni dinamik inkişaf mərhələsinə qədəm qoyub. Bu əlamətdar gün münasibətilə Sizə, kollektivinizə möhkəm cansağlığı, yeni-yeni uğurlar, daha böyük nailiyyətlər və davamlı inkişaf arzulayırıq. Əminik ki, Mərkəzi Elmi Kitabxana bundan sonra da Azərbaycan elminin inkişafında, intellektual mühitin zənginləşdirilməsində və milli maarifçiliyimizin güclənməsində mühüm rol oynamaqda davam edəcək”, - deyə o təbrik məktubunda bildirib.