Kitaba bağlı insanlar mənsub olduğu cəmiyyətlərin taleyində mühüm rol oynayıblar. O cəmiyyətlərdə ki, bu balans pozulur, orada inkişaf da olmur. Bu baxımdan, AMEA-nın Mərkəzi Elmi Kitabxanasının 100 illiyinin təntənəli şəkildə keçirilməsi mühüm hadisədir. Tədbirin əhəmiyyəti ondadır ki, burada kitaba bağlılıq, kitabsevərlik təbliğ edilir, həm də kitabxananın gələcək inkişaf perspektivləri müəyyən olunur. Bu sözləri AMEA-nın Mərkəzi Elmi Kitabxanasının 100 illiyinə həsr olunmuş konfransda Milli Məclisin Mədəniyyət Komitəsinin sədri Fazil Mustafa deyib. O qeyd edib ki, bugünkü kitabxana, əslində qloballaşan kitabxana modelinin optimal variantlarının tapılması ilə bağlıdır: “Hansı ölkədə klassik kitabxana modelindən müasir kitabxana modellərinə keçid mümkün olacaqsa, orada həm də ictimai tərəqqinin əsas istiqamətlərini tapmaq mümkün olacaqdır. Bu baxımdan, sevinirəm ki, Azərbaycanın da belə bir kitabxanası var. Bu kitabxana sadəcə formal olaraq bir binadan ibarət deyil, həm də kitabxana ruhunu özündə əks etdirən bir məbədə çevrilməkdədir. Bu kitabxanadan biz də istifadə edirik və akademiklər, digər müəlliflər öz kitabxana fondunu bura etibar edir. Bu cür elm məbədlərinin sayı nə qədər çox olacaqsa, Azərbaycan cəmiyyətinin gələcəyi də bir o qədər parlaq olacaqdır”, - deyə Fazil Mustafa qeyd edib.