Türkiyənin İstanbul Universitetinin Mərkəzi Kitabxanasının direktoru Sonay Tahmaz Kaleci noyabrın 21-də AMEA-nın Mərkəzi Elmi Kitabxanasının 100 illik yubiley tədbirində iştirakın onların üçün böyük şərəf olduğunu qeyd edib. O, İstanbul Universiteti adından tədbirə dəvət üçün dərin təşəkkürünü ifadə edib. O bildirib ki, MEK yalnız Azərbaycanın elmi və mədəni inkişafına yol göstərən bir qurum olmaqla kifayətlənmir, həm də informasiya mübadiləsi, elmi əməkdaşlıq və mədəni dəyərlərin qorunub saxlanmasında əhəmiyyətli rol oynayır. Sonay Tahmaz Kaleci MEK-in ənənə və yeniliyi, rəqəmsal bazanı və yerli təcrübələri ölkələrarası baxış bucağı ilə balanslaşdırma qabiliyyətini xüsusi vurğulayıb və kitabxananın 100 illik fəaliyyət dövrünü uğurla tamamladığını qeyd edib. Kaleci bütün kollektivi bu əlamətdar yubiley münasibətilə səmimi qəlbdən təbrik edib. Çıxışçı, həmçinin qeyd edib ki, tədbirdə iştirak Azərbaycan və Türkiyə arasındakı möhkəm əlaqələri, ortaq tarixi və gələcəyə yönəlik birgə məqsədləri bir daha nümayiş etdirir. O, əlavə edib ki, gələcəyə çiyin-çiyinə addımlayan iki qardaş ölkə olaraq, elmdən mədəniyyətə, təhsildən adət-ənənələrə qədər geniş sahələrdə əməkdaşlıqdan qürur duyurlar və bu konfrans ortaq baxışların elmi sahədəki ən dəyərli ifadələrindən biridir.