Prezident Kitabxanasının direktoru professor Afət Abbasova AMEA-nın Mərkəzi Elmi Kitabxanasının 100 illik yubileyinə həsr olunmuş konfransda qeyd edib ki, bugünkü tədbirin məqsədi yalnız bir kitabxananın 100 illik inkişaf yolunu qeyd etmək deyil, həm də ümumilikdə kitabxanaların son 100 ildə keçdiyi mərhələləri, müasir dövrdə qarşı-qarşıya qaldıqları çağırışları və bu istiqamətdə həyata keçirilməsi zəruri olan tədbirləri müzakirə etməkdir. O, tədbirin yüksək səviyyədə təşkilinə görə təşkilatçılara minnətdarlığını bildirib. Professor Afət Abbasova vurğulayıb ki, tədbirə ev sahibliyi edən Mərkəzi Elmi Kitabxana çox böyük və əhəmiyyətli bir yol keçib. Onun sözlərinə görə, xüsusilə Hüseyn Hüseynovun rəhbərliyə təyin olunmasından sonra kitabxanada rəqəmsallaşma sahəsində, süni intellektin tətbiqində və innovativ xidmətlərin genişləndirilməsində ciddi nailiyyətlər əldə olunub. Daha sonra o, Prezident Kitabxanasının fəaliyyəti barədə məlumat verərək bildirib ki, cari ilin may ayında kitabxananın yenilənmiş rəsmi internet saytı oxucuların istifadəsinə təqdim olunub. Qısa müddət ərzində sayta daxil olanların sayı 120 mini ötərək həm yerli, həm də beynəlxalq auditoriyanın marağına səbəb olub. İstifadəçilər arasında Azərbaycanla yanaşı, Sinqapur, Çili, Avstriya, Rusiya, Böyük Britaniya və ABŞ-dan olan oxucular da yer alır. Afət Abbasova əlavə edib ki, Prezident Kitabxanası hazırda üç dildə – Azərbaycan, rus və ingilis dillərində 50 tammətnli elektron layihəni oxuculara təqdim edir. Rus və ingilis dillərində olan layihələrin baxış sayı ümumilikdə 25 minə çatıb. O, həmçinin xatırladıb ki, Azərbaycan Milli Elmlər Akademiyasının 80 illik yubileyində Prezident İlham Əliyevin çıxışından sonra kitabxanaların qarşısında mühüm vəzifələr qoyulub. Bu tapşırıqlardan irəli gələrək, Prezident Kitabxanası Sovet Ermənistanında mövcud olmuş bütün toponimlərin Azərbaycan dilində hazırlanmış nəşrini əldə edib. Professor A.Abbasova tədbirdə iştirak edən kitabxana rəhbərlərini və tədqiqatçıları bu istiqamətdə kitabxananın zəngin fondlarından istifadə etməyə dəvət edib.