Türkiyənin Rami Kitabxanasının direktoru Əli Çelik AMEA-nın Mərkəzi Elmi Kitabxanasının 100 illik yubileyinə həsr olunmuş konfransda çıxışında bildirib ki, bu gün təkcə bir kitabxananın yüzillik yubileyi qeyd edilmir, həm də bu yüzillik tarixə şahidlik etmək məqsədilə bir araya toplanılıb. Onun sözlərinə görə, bir neçə ay əvvəl AMEA Mərkəzi Elmi Kitabxanasının direktoru Hüseyn Hüseynovun təşəbbüsü ilə hər iki qurum arasında qardaş kitabxana əlaqələri qurulub və bu təşəbbüs Rami Kitabxanası tərəfindən yüksək qiymətləndirilir. Əli Çelik vurğulayıb ki, Rami Kitabxanası hər nə qədər 100 illik kitabxana xidməti ənənəsinə malik olmasa da, yerləşdiyi məkan və tarixi baxımından 200 illik bir irsi özündə ehtiva edir. Daha əvvəl müxtəlif məqsədlərlə istifadə olunan bina genişmiqyaslı restavrasiya olunub və müasir texnologiyalarla təchiz edilərək kitabxana kimi fəaliyyətə başlayıb. O, Azərbaycan Milli Elmlər Akademiyasının Mərkəzi Elmi Kitabxanasının 100 illik elmi yaddaşı ilə Rami Kitabxanasının tarixi mirasının bir araya gəlməsinin gələcəkdə faydalı əməkdaşlıqlar üçün ciddi potensial yaratdığını qeyd edib. Bu çərçivədə yaxın aylarda birgə seminarların, konfransların, sərgilərin və elmi toplantıların keçirilməsinin planlaşdırıldığı da bildirib. Ə.Çelik xüsusilə AMEA prezidentinin çıxışına toxunaraq onun həm dünya kitabxanalarına yanaşması, həm də Türkiyə-Azərbaycan qardaşlığının kitabxanaçılıq müstəvisində təzahürü baxımından mühüm fikirlər səsləndirdiyini vurğulayıb. O, kitabxanaların mövcudluğunun dilin və mədəniyyətin qorunmasında mühüm rol oynadığını da diqqətə çatdırıb. Qarabağ bölgəsində ermənilərin mədəni irsi məhv etməyə yönəlmiş cəhdlərinə baxmayaraq, kitabxana kimi qurumlarda elmi və intellektual fəaliyyətin davam etməsi sayəsində həmin irsin yenidən bərpa olunacağına inamını ifadə edib. Sonda Əli Çelik Mərkəzi Elmi Kitabxananın 100 illik yubileyini səmimi şəkildə təbrik edib.