Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) həyətyanı ərazisində aparılan yaşıllaşdırma işləri öz estetik görünüşü ilə xüsusi diqqət çəkir. Mərkəzi Elmi Kitabxananın qarşısındakı yaşıllıq zolaqları, park sahələri və dekorativ və həmişəyaşıl ağaclar yalnız vizual gözəllik yaratmaqla kifayətlənmir, eyni zamanda əraziyə xoş və rahat atmosfer bəxş edir. Daimi qulluq göstərilən bağlar, ağaclar və təbii landşaft elementləri təbiətin füsunkarlığını əyani şəkildə nümayiş etdirir. Xüsusilə Azərbaycan üçün nadir hesab olunan yapon mənşəli sakura ağaclarının çiçəkləməsi əraziyə fərqli bir gözəllik qatır. Bu ağaclar həm kitabxana oxucularının, həm də ərazidə istirahət edən alimlərin, gənclərin və tələbələrin marağına səbəb olur. Qeyd edək ki, Mərkəzi Elmi Kitabxananın yeni binasının layihələndirilməsində ətraf mühitin qorunması və ekoloji tarazlıqla vəhdət təşkil etməsi prioritet təşkil edib. Kitabxananın istifadəyə verildiyi 2014-cü ildən bu istiqamətdə ardıcıl tədbirlər həyata keçirilir.