AMEA-nın Mərkəzi Elmi Kitabxanasında AMEA-nın elmi-tədqiqat institutlarında çalışan kitabxanaçıların peşə bacarıqlarını inkişaf etdirmək, qabaqcıl təcrübəni yaymaq və kitabxana-informasiya sahəsində elmi-innovativ bilikləri tətbiq etmək məqsədilə keçirilən ixtisasartırma təlimləri başa çatıb. Təlimlər nəzəri biliklərlə yanaşı, praktik məşğələlər və interaktiv müzakirələrlə müşayiət olunub. MEK-in direktoru, texnika elmləri doktoru, dosent Hüseyn Hüseynov təlimlərin elmi müəssisələrdə fəaliyyət göstərən kitabxanaçıların peşəkar inkişafında mühüm rol oynadığını bildirib. Direktor qeyd edib ki, informasiya texnologiyalarının sürətli inkişafı kitabxana sahəsində çalışan mütəxəssislərdən yeni bilik və bacarıqlar tələb edir və təşkil olunan təlimlər məhz bu istiqamətdə mühüm əhəmiyyət daşıyır. Hüseyn Hüseynov əldə olunan biliklərin gələcək fəaliyyətlərdə uğurla tətbiq ediləcəyinə əminliyini bildirib, iştirakçıların fəallığını yüksək qiymətləndirib. İştirakçılar təlimin onların gündəlik iş fəaliyyətlərində faydalı olacağını qeyd edərək, proqramın yüksək səviyyədə təşkilinə görə təşəkkürlərini bildiriblər. Sonda təlim proqramını uğurla başa vuran iştirakçılara sertifikatlar təqdim olunub. Qeyd edək ki, MEK-in mütəxəssisləri tərəfindən keçirilən “Biliyin gələcəyi və innovasiyalar” adlı təlimlərdə iştirakçılar iki həftə ərzində akademik kitabxanalarda süni intellektin tətbiqi, korporativ kitabxana sistemləri, rəqəmsal kolleksiyaların formalaşdırılması, nadir nəşrlərin qorunması və kitabxana işinə dair digər mühüm biliklər əldə ediblər.