Azərbaycan Respublikasında “Konstitusiya və Suverenlik İli” çərçivəsində Pedaqoji Universitetin (ADPU) Quba filialında Prezident təqaüdçüsü, Azərbaycan Respublikasının Əməkdar müəllimi, Azərbaycan Dövlət Pedaqoji Universitetinin beynəlxalq əlaqələr üzrə prorektoru, Qərbi Azərbaycan İcması İdarə Heyətinin üzvü, filologiya elmləri doktoru, professor Mahirə Hüseynovanın anadan olmasının 65 illik yubileyi və elmi-pedaqoji, ədəbi fəaliyyətinə həsr olunmuş “Qəlbi azərbaycanlı, Qərbi azərbaycanlı!” mövzusunda təntənəli ədəbi-bədii gecə keçirilib. Tədbirdə AMEA Mərkəzi Elmi Kitabxanasının direktoru texnika elmləri doktoru, Hüseyn Hüseynov da iştirak edib. O, öz nitqində professor Mahirə Hüseynovanın Azərbaycan elminə, təhsilinə və milli-mənəvi dəyərlərin təbliğinə verdiyi töhfələri yüksək qiymətləndirib. Hüseyn Hüseynov qeyd edib ki, Mahirə Hüseynovanın pedaqoji fəaliyyəti, tədqiqat işləri və ictimai mövqeyi Azərbaycan qadınının elmə və milli kimliyə sədaqətinin parlaq nümunəsidir. Professor Mahirə Hüseynovanın həm ziyalı, həm də vətəndaş kimi gənc nəsil üçün örnək bir sima olduğunu bildirən MEK-in direktoru onun yaradıcılığının Qərbi Azərbaycan yaddaşının qorunması, milli köklərimizin təbliği baxımından mühüm elmi və mənəvi dəyərə malik olduğunu vurğulayıb. Hüseyn Hüseynov, həmçinin AMEA Mərkəzi Elmi Kitabxanasının bu kimi ziyalıların irsinin toplanması, tədqiqi və gələcək nəsillərə çatdırılması istiqamətində fəaliyyətini də diqqətə çatdırıb. Tədbirdə tanınmış ictimai xadimlər, alimlər, şair və yazıçılar iştirak ediblər. Onlar professor Mahirə Hüseynovanın çoxşaxəli elmi və ədəbi yaradıcılığını yüksək dəyərləndirərək onun Azərbaycan mədəniyyətinə və təhsilinə verdiyi töhfələri barədə fikirlərini bölüşüblər.