MEK-in tərtibatında AMEA-nın müxbir üzvü Əbülfəz Quliyevin biblioqrafik göstəricisi nəşr olunub Azərbaycan Milli Elmlər Akademiyası (AMEA) Mərkəzi Elmi Kitabxanasının (MEK) tərtibatında AMEA Naxçıvan Bölməsi İncəsənət, Dil və Ədəbiyyat İnstitutunun direktoru, AMEA-nın müxbir üzvü, tanınmış dilçi-türkoloq alim və pedaqoq Əbülfəz Aman oğlu Quliyevin həyatı, elmi-ictimai fəaliyyətini əks etdirən biblioqrafik göstərici çapdan çıxıb. Biblioqrafik göstərici alimin 75 illik yubileyi münasibətilə AMEA Rəyasət Heyətinin qərarına əsasən nəşr olunub. Vəsaitə alimin elmi və pedaqoji fəaliyyətini əks etdirən monoqrafiyaları, tərtib və tərcümə etdiyi kitabları, elmi və elmi-kütləvi məqalələri, dərslik və redaktə etdiyi əsərləri, dissertasiyalara rəhbərlik və opponentlik işləri daxil edilib. Burada, həmçinin alimin özü və əsərləri haqqında nəşr olunan yazılar və Azərbaycan dilinin tarixi və türk dillərinin tarixini geniş təbliğ edən müxtəlif konfrans, simpozium və elmi seminarlarda etdiyi çıxış və məruzələri öz əksini tapıb. Nəşrin elmi redaktoru MEK-in direktoru texnika elmləri doktoru Hüseyn Hüseynovdur. Redaktorları Biblioqrafiya şöbəsinin müdiri, fil.ü.f.d. Aytən Əliyeva və Elmi biblioqrafiya sektorunun rəhbəri Nərgiz Novruzova, tərtibçiləri isə şöbənin əməkdaşları Mahnur Həsənova və Aliyə Əbülfəzqızıdır. Azərbaycan dilçiliyi, türkologiya sahəsində çalışan alim və mütəxəssislər, ali məktəb tələbələri, o cümlədən geniş oxucu kütləsi üçün nəzərdə tutulan bu nəşr, həm də elektron şəkildə oxuculara təqdim olunub.