Məmmədova Xədicə Fizuli qızı. Dövlət idarəçiliyində etika. Gəncə, ATU-nun mətbəəsi, 2026.

Müasir cəmiyyətlərdə etik məsələlər ümumbəşəri mahiyyət daşıyaraq sosial, siyasi və institusional münasibətlərin ayrılmaz tərkib hissəsinə çevrilmişdir. İdarəetmə fəaliyyəti tarixən insan davranışı və sosial münasibətlərlə sıx bağlı olmuş, bu kontekstdə dövlət idarəetməsi xüsusi yer tutmuşdur. Dövlət idarəetməsinin necə qurulması və həyata keçirilməsi digər idarəetmə formalarının funksional səmərəliliyinə birbaşa təsir göstərdiyindən, onun optimal və rasional təşkili hər zaman prioritet məsələ kimi qiymətləndirilmişdir. Dövlət idarəetmə sisteminin əsas dayaqlarından biri olan dövlət qulluğu, dövlətin məqsəd və vəzifələrinin icrasında mühüm rol oynayır və bu sahədə effektivliyin təmin edilməsi yalnız müəyyənləşdirilmiş prinsip və dəyərlərə əsaslanan fəaliyyət mexanizmi vasitəsilə mümkündür. Bu baxımdan, dövlət qulluqçularının elmi biliklərini və xidməti səlahiyyətlərini vicdanlı, ədalətli və qərəzsiz şəkildə reallaşdırmaları məsələsi etik yanaşmanın mərkəzi problemlərindən biri kimi çıxış edir və dövlət qulluğunun peşəkar və məsuliyyətli icrasını şərtləndirən əsas amillər sırasında yer alır.