Noyabrın 25-də Azərbaycan Dövlət Pedaqoji Universitetində (ADPU) ADPU-nun, Elm və Təhsil Nazirliyinin akademik Y. Məmmədəliyev adına Neft-Kimya Prosesləri İnstitutunun və Naxçıvan Dövlət Universitetinin birgə təşkilatçılığı ilə akademik Yusif Məmmədəliyevin 120 illik yubileyinə həsr olunmuş “Kimya, Texnologiya, Ekologiya” adlı respublika elmi konfransı keçirilib. Tədbirdə ölkənin müxtəlif ali təhsil müəssisələri və elmi-tədqiqat institutlarından alimlər, tədqiqatçılar və gənc mütəxəssislər iştirak ediblər. Konfransda AMEA-nın Mərkəzi Elmi Kitabxanasının əməkdaşı Könül Hüseynova “Yaşıl enerji və yaşıl iqtisadiyyat: Azərbaycanda ekoloji siyasətin və dövlət strategiyasının əsas istiqamətləri” adlı məruzə ilə çıxış edib. O, məruzəsində yaşıl enerji və yaşıl iqtisadiyyat anlayışlarının mahiyyətini, onların ekoloji siyasət və dayanıqlı inkişafla əlaqəsini izah edib, həmçinin Azərbaycan Respublikasında həyata keçirilən dövlət strategiyaları və prezident sərəncamları kontekstində mövzunu təhlil edib. Ekoloji sabitlik, alternativ enerji mənbələrinin inkişafı, resursların səmərəli idarə olunması və ekosistemlərin qorunması kimi amillərin yaşıl iqtisadiyyatın əsas dayaqları olduğu diqqətə çatdırılıb. Konfrans çərçivəsində keçirilən “Kimyanın aktual problemləri”, “Yaşıl enerji və ekoloji problemlər” və “Kimyanın tədrisinin müasir üsulları” adlı bölmə iclaslarında neft-kimya prosesləri, yaşıl texnologiyalar, ekoloji dayanıqlıq, yeni katalizatorların hazırlanması və kimyanın tədrisində innovativ yanaşmalarla bağlı elmi məruzələr dinlənilib.