. Multikulturalizmə giriş fənni üzrə proqram (bakalavr səviyyəsi üçün). Bakı, , 2019.

Müasir dövrdə dünya dövlətlərinin əksəriyyətində tarixi prosesin inkişafının nəticəsi olan və buna görə də obyektiv xarakter daşıyan etnik, irqi, dini və mədəni müxtəlifliklərin tənzimlənməsinin ən səmərəli siyasət modeli multikulturalizmdir. Multikulturalizm qeyd olunan müxtəlifliklərin tənzimlənməsinə yönələn bir siyasət kimi digər mümkün siyasətlərdən fərqli olaraq milli azlıqların etnik-mədəni dəyərlərini nə assimilyasiyaya uğradır, nə də onların bu dəyərlərinin inkişafını cəmiyyətin inkişafından təcrid edir. Multikulturalizm titul etnos ilə milli azlıqların etnik-mədəni dəyərlərinin inkişafına eyni şərait yaratmaqla onların mədəniyyətlərinin qarşılıqlı təsiri üçün zəmin yaradır. Multikulturalizm bir sosial hadisə kimi öz əhəmiyyətinə görə sosial ədalət, imkanların bərabərliyi, demokratiya kimi anlayışların sırasına daxildir. Belə ki, hər bir milli azlığın, azsaylı xalqın, etnik qrupun, dini konfessiyanın hüquq və azadlıqlarının qorunması, onların qanun qarşısında bərabər olmalarının təmin edilməsi həm sosial ədalətin tələblərinə, həm də demokratik cəmiyyətin normalarına uyğun gəlir. «Multikulturalizmə giriş» nəzəri və praktiki əhəmiyyətə malik olan bir fəndir. Bu fənn fəlsəfə, tarix, sosiologiya, kulturologiya, hüquq, politologiya kimi ictimai elmlərin bir çox nəzəri müddəalarından istifadə edir. «Multikulturalizmə giriş» bakalavr səviyyəsi üçün nəzərdə tutulmuşdur. Fənnin tədrisinə 30 saat ayrılmışdır (onlardan 16 saatı mühazirə, 14 saatı məşğələ).