Bağırov Samid Əlipaşa oğlu. Şah İsmayılın həyatı ("Fütuhati- şahi" və "Həbibüs-siyər" əsərləri əsasında). Bakı, AVE print, 2025.

2024-cü il Azərbaycanın unudulmaz tarixi şəxsiyyəti Şah İsmayıl Xətayinin vəfatının 500 illiyinə təsadüf edir. Cari il bu görkəmli dövlət xadiminə, şair və mütəfəkkirinə, habelə onun təsis etdiyi Səfəvilər dövlətinə həsr edilən müxtəlif elmi tədbirlərə şahiddir. Bu elmi tədbirlər və ərsəyə gətirilən əsərlər Şah İsmayıl haqqında yazılması və araşdırılması vacib olan işlərin çox az bir qismini əhatə edir. Azərbaycan müstəqilliyini əldə edəndən sonra, xüsusilə də son illərdə böyük tarixi şəxsiyyətlər ildönümləri və yubileylərinə müvafiq olaraq anılır və dövlət səviyyəsində fərqli illər onların adları ilə adlanaraq, müxtəlif tədbirlər keçirilir.