Səmədzadə Ziyad. Qarabağ iqtisadiyyatı 100 ildə. V. Bakı, , 2022.

Oxuculara təqdim olunan beşinci cilddə - "Qarabağ Azərbaycandır! Qarabağ iqtisadiyyatı 100 ildə. Böyük Qayıdış" ilk olaraq dövlətin iqtisadi təhlükəsizliyi milli təhlükəsizliyin əsası kimi fikir süzgəcindən keçirilib. Bütövlükdə V cilddə prioritet istiqamət kimi Qarabağ mövzusu, xüsusilə də regionun son 100 ildə iqtisadi, demoqrafik inkişaf məsələləri ön plana çəkilib. Burada XIX əsrdən başlayaraq indiyədək Azərbaycan ərazilərində gedən proseslər Azərbaycanın bu dövrdə üzləşdiyi milli və siyasi ədalətsizliklər, torpaqlarımızın işğalı və Vətən müharibəsində qazanılan Zəfərin tariximizdəki rolu kontenkstindən nəzərdən keçirilir. Qarabağın qədim Azərbaycan torpağı olması, Şuşa şəhərinin salınması və inkişafı, XIX əsrin birinci yarısından ermənilərin Qarabağa köçürülməsi, azərbaycanlılara qarşı soyqırımı cinayətlərinin törədilməsi, Qarabağın sovet dövrü, Ermənistan SSR-in Azərbaycana qarşı əsassız torpaq iddialarının iflasa uğradılması, Ulu Öndər Heydər Əliyevin Şuşanın mədəni və iqtisadi dirçəlişi üçün gördüyü işlər və hələ SSRİ dövründə böyük müdrikliklə xalqımıza qarşı məkrli planların qarşısını alması, müstəqillik illərində torpaqlarımızın azad edilməsi üçün aparılan sülh danışıqları, bununla əlaqədar Heydər Əliyevin və İlham Əliyevin siyasi uğurları, Ermənistanın bütün siyasi platformalarda diplomatik küncə sıxışdırılması beşinci cilddə diqqət yetirilən məsələlərdir.