Nəbiyev Bəkir. Görkəmli tənqidçi və ədəbiyyatşünas (F. Köçərlinin həyatı və yaradıcılığı). Bakı, Azərbaycan SSR Elmlər Akademiyası nəşriyyatı, 1963.

Azərbaycan ədəbi tənqidinin və ədəbiyyatşünaslığının M. F. Axundovdan sonra fəaliyyət göstərmiş görkəmli nümayəndələrindən biri Firidun bəy Köçərlidir. O, özünün 35 illik ədəbi, elmi-pedaqoji, publisist fəaliyyətinin nəticəsi olan zəngin bir irs qoyub getmişdir. Köçərli "Literatura aderbeydjanskih tatar" ("Azərbaycan tatarlarının ədəbiyyatı"), "Mirzə Fətəli Axundov", "Balalara hədiyyə" əsərlərinin, iki cildlik məşhur "Azərbaycan ədəbiyyatı tarixi materialları"nın və bir sıra başqa görkəmli əsərlərin müəllifidir. Bunlardan başqa, Köçərli ədəbi şəxsiyyətlər, bədii əsərlər, dərslik və tərcümələr haqqında, sülh və xalqlar dostluğu, qadın azadlığı, habelə məişət mövzularında bir sıra maraqlı məqalələr yazmışdır.