Dostiyev Tarix. Şəmkirin şirli keramikasi: forma və məzmunun birləşdiyi mədəniyyət fenomeni. Bakı, Elm, 2025.

Monoqrafiyada 2006-2025-ci illərdə Şəmkir şəhər yerində aparılmış arxeoloji qazıntılar nəticəsində əldə olunan şirli saxsı məmulatı və fayans qablar tədqiqata cəlb olunmuş, şəhər sakinlərin məişəti ilə sıx bağlı olan bu tapıntılar sistemləşdirilmiş, onların tipoloji təsnifatı aparılmış, istehsal texnologiyası və bədii işlənmə texnikası müəyyənləşdirilmiş, təkamülü izlənilmiş, Şəmkir dulusçuluğunun Arran keramika məktəbinin mühüm mərkəzlərindən biri olduğu sübuta yetirilmişdir. Dulusçu-rəssamların gildən yüksək peşəkarlıqla hazırladıqları, forma və məzmunun vəhdət təşkil etdiyi Şəmkirin şirli keramikasında – bu mədəniyyət fenomenində ornament, xəttatlıq və təsviri sənət çox vaxt ahəngdar şəkildə böyük mükəmməlliklə birləşir. Naxış motivlərinin sonsuz müxtəlifliyi, kompozisiyanın uğurlu quruluşu və bitkinliyi, rəng çalarlarının əlvanlığı və parlaqlığı el sənətkarlarının yüksək peşəkarlığını, incə zövqünü nümayiş etdirir. Monoqrafiyada tədqiq edilən şirli keramika Şəmkir şəhərinin Arran keramika məktəbinin mühüm mərkəzi olmaqla Azərbaycan şirli keramikasına xas xüsusiyyətləri qabarıq əks etdirdiyini, həm də məhəlli özəllikləri ilə fərqləndiyini, İslam keramikasında layiqli yer tutduğunu təsdiqləməyə imkan verir.