. Ədəbiyyat üzrə Nobel mükafatçıları 1901-2017 (antologiya) Əyyub Qiyasın tərcümə və təqdimatında Ədəbiyyat qəzeti yayınları. Bakı, Elm və təhsil, 2019.

1990-cı ildə "Gənclik" jurnalının 4-cü sayında ilk müsəlman Nobelçisi Abdus Salam barədə "Dahi və dünya" adlı məqaləm dərc olunmuşdu. Bu, Azərbaycanda Abdus Salam haqqında yazılmış ilk yazı idi... 2001-ci ilin yayında isə "Yeni Azərbaycan" qəzetinin "Ədəbiyyať" əlavəsi nəşrə başlayanda onun ilk sayında Pol Elüarın şeirləri ilə yanaşı, bilmirəm nə üçünsə bir ədəbiyyatçının deyil, bir fizikçinin Abdus Salamın Nobel nitqini dərc etdik... Abdus Salam heyranlığı məni uzun müddət tərk etmədi. Zaman keçdikcə onu da öyrəndim ki, 1910-cu ildə "Revue du Monde Mosulman" jurnalı tərəfindən Nobel mükafatı laureatlığına namizədliyi təklif olunmuş ilk türk yazıçısı tatar kökənli İsmayıl bay Qasprinski olub. V_{0} indi bu sətirləri yazarkən onu da düşünürəm ki, İsmayıl bəy Qaspıralının, az qala, müxtəlif izmlərin xəlitəsindən yoğurub yaratdığı "Darürrahat müsəlmanları" romanı estetik hörgüsünə görə ötən yüzilin əvvəllərində seçilib dəyərləndirilən bir çox nobelçinin romanlarından geri qalmır...