Vahidov, Erkin. Söz lətafəti. Bakı, Elm və təhsil, 2024.

Özbəkistanda bir neçə dəfə nəşr olunan “Söz lətafəti” kitabı xalq arasında, mətbuatda geniş müzakirələrə səbəb olmuşdur. Bununla bağlı tanınmış dilçilər, ədəbiyyatşünaslar, xarici alim və yazıçılar öz fikir və düşüncələrini bildiriblər.“Söz lətafəti”nin ikinci nəşrindən Azərbaycan dilinə uyğunlaşdırılan mətn – kitab əlinizdədir. Müəllifin yazdığı kimi, “ədəbi yaradıcılıq həmişə söz aləminə səyahətdir”. Sənətkar bu əsərində hər kəlməmizə yeni həyat verib, sözlərimizin “əslini-zatını axtararaq yeddi arxa dönəninin izinə” düşüb, milli hünər göstərmişdir. Olduqca maraqlı, tarixi köklərə bağlı duyğular və reallıqlar fövqündə “söz ilə sözləşib”. Əsərin dilçilərimiz üçün maraqlı olduğuna heç şübhə yox, eyni zamanda kitabı əlinə alan hər kəs üçün də həm elmi, həm də bədii təxəyyül məhsulu olaraq qiymətli mənbə olacaqdır.