Vaqifqızı (Süleymanova) Ləman. Şərur folklor örnəkləri, II kitab (Havuş kənd sakinindən toplanmış nümunələr). Bakı, Elm və təhsil, 2023.

Biz, adətən, Azərbaycanın rayonlarını, kəndlərini qarış-qarış gəzərək xalqın folklorunu, adət-ənənəsini, etnoqrafiyasını yaxşı bilən şəxsləri axtarır, onlarla söhbətləşməyə çalışırıq. Onlardan min bir əziyyətlə topladığımız materialları saf-çürük edir, folklor toplularını tərtib edirik. Amma heç ağlımıza da gəlmir ki, lap yanımızda iş yoldaşlarımızın arasında bəzən şifahi xalq ədəbiyyatını, xalqının məişətini yaxşı bilənlər var. İş yoldaşımız, "Türk xalqları folkloru" şöbəsinin elmi işçisi Südabə Əkbər qızı Həsənovanın eyni zamanda yaxşı söyləyici olduğunu eşidib, hərəkətə keçdik. Onu da qeyd edək ki, elmi müəssisənin əməkdaşının da tədqiqata cəlb edilməsi halına indiyədək rast gəlməmişdik. Bu, bizim tərəfimizdən ilk dəfə təcrübə edildi və düşünürük ki, səmərəli nəticə verdi.