Gəncəli Sabir. Qadın, gözəllik və ülviyyət. Bakı, Azərbaycan nəşriyyatı, 2001.

Ulu tanrı yaşadığımız Yer kürəsini yaradanda insanları bir gözdə görüb. Günəşi, Ayı, təbiəti, bir sözlə bütün nemətləri hamı üçün bəxş edib. Çox təəssüb ki, insanlar əsrlər boyu bu həqiqəti anlamayıb, illər uzunu müharibələr aparıb, qırğınlar törədiblər. Eramızın üçüncü minilliyinə qədəm qoyduğumuz bir dövrdə hamı bu həqiqəti dərk etməlidir ki, irqçilik, şovinizm, milli özünəqapılmaq ruhu xəstəlikdir. O bəşəriyyəti gözəl hisslərdən, mənəvi-əxlaqi dəyərlərdən uzaqlaşdırır, ali varlıq olan insanı cılızlaşdırır. Bəşər övladı, əcdadımız bir anadan, bir kökdən pöhrələnmişdir. Hamı bir Allaha sitayiş edir. Belə olan halda nə üçün insanlar bir-birinə qardaş, bir-birinə mehriban olmasınlar? Araya nifaq salan Şeytandan, şər qüvvələrdən uzaqlaşmaq lazım deyilmi? Bu ensiklopedik toplunu hazırlayarkən bu düşüncələr qəlbimə sanki işıq saçdı. Vətənpərvərlik, milli qürür hissima alicənablıq, bəşəri məhəbbət duyğuları ələndi. İllərdən bəri tədqiq etdiyim, araş dırdığım mövzunu bir qədər də genişləndirib gözəl dünyamıza nəzər salmağa başladım. İstəyim, məqsədim budur ki, yurdumuzun övladları öz əcdadlarını, öz diyarlarını, xalqını və eyni zamanda dünyanı tanısınlar. Dünya səviyyəsinə çatmaq üçün oxuyub-öyrənsinlər, məlumatları artsın. Planetimizdə nə gözəl şey mənəvi-əxlaqi dəyər varsa, əxz etsinlər.