Kazımoğlu Muxtar, Qasımova Fidan. Şərur folklor örnəkləri, I kitab. Bakı, Elm və təhsil, 2016.

Çap olunmuş materiallar əsasında qeyd etdiyimiz bütün bu cəhətlər AMEA Folklor İnstitutu əməkdaşlarının son illər toplayıb nəşrə hazırladığı Şərur folklor örnəklərində də öz təsdiqini tapır. Yeri gəlmişkən qeyd edək ki, Naxçıvan Muxtar Respublikasında folklor nümunələri və etnoqrafik materialların toplanması üçün əlverişli şərait vardır. Bu şəraitin yaranmasında dövlət əhəmiyyətli tədbirlər və qəbul edilmiş rəsmi sənədlər mühüm rol oynayır. Naxçıvan Muxtar Respublikası Ali Məcli-sinin sədri Vasif Talıbovun xalq yaradıcılığı ilə bağlı 07 fevral 2009-cu il tarixli sərəncamı belə mühüm rəsmi sənədlərdən biridir. Həmin sənəddə Naxçıvan Muxtar Respublikası ərazisində mövcud olan folklor nümunələri və etnoqrafik materialların toplanması, sistemləşdirilməsi və elmi tədqiqatlara cəlb olunması üçün xüsusi tədbirlər görülməsi bir vəzifə kimi qarşıya qoyulur. Xüsusi dövlət qayğısı şəraitində toplanan Şərur örnək-ləri Naxçıvan folkloru ilə bağlı təsəvvürümüzü daha da dolğunlaşdırır və bir sıra qaranlıq nöqtələrə müəyyən qədər işıq salır. Belə qaranlıq nöqtələrdən biri Novruz çərşənbələri ilə bağlıdır.